Saitual district chu ruihhlo kalkawng a ni: sawrkar leh mipuite ruihhlo do kawngah tanrual a tul- Chief Secretary

by News Editor

Tualchhung News

ZORAM TODAY| 7th February, 2026 : Vawiin khan Chief Secretary Khilli Ram Meena chuan Saitual District-a Head of Office te a kawm a, he hun hi Saitual Bawrhsap Srinivas Sadi in a kai hruai.

Sorkar thuchhuah tarlan danin, Chief Secretary hian Saituala department hrang hranga officer kalkhawmte chungah lawmthu a sawi a, Saitual district chu a vawi khat tlawhna a nih thu sawiin, hun hlawkthlak tak a hman thu a sawi.

Khilli Ram Meena chuan Saitual district chu ruihhlo kalkawng a nih avangin, sawrkar leh khawtlang mipuite chu ruihhlo do kawngah tanrual a tul tih a sawi a, DC leh SP te chu khawtlang leh kohhran hruaitute nen thawk ho a theih tawp chhuah turin a chah a ni. Khilli Ram Meena chuan Saitual District chu Manipur leh Myanmar ram nen a inri avangin raltlante pawh biometric registration tih vek tha a tih thu sawi bawk.

Chief Secretary chuan Sawrkar laipui scheme tha tak tak a tam tih sawiin, mi tam takin heng scheme te hi hmasawn nana an hman a, an lo tangkaipui theih nan department tin te chuan thawhhona tha an neih a pawimawh thu a sawi bawk a ni.

Vawiin thutkhawm hi Srinivas Sadi, DC in a kai hruai a, Saitual chungchang sawi zauna hun hmangin, Gaurav Tyagi, SP chuan Police hnathawhte a sawi zau bawk a ni.

Chief Secretary hian Seling-ah Saansad Adarsh Gram Yojana (SAGY) hnuaia project hrang hrang te a tlawh a, Saitualah hian Head of Office te nen an inkawm hnuah Tamdil a tlawh bawk .